ትምህርት

ቅድስት

የዐቢይ ጾም ሁለተኛ ሳምንት ቅድስት ይባላል፡፡ የሰንበትን ቅድስና የሚያዘክር ምስጋና የሚቀርብበት ሳምንት ነው፡፡ በተጨማሪ ቅድስት የተባለበት ምክንያት 40 ቀን የጌታችን ጾም የሚጀምርበት ሳምንት ስለሆነ ቅድስት ጾሙን ለማዘከር ቅድስት ተብሏል፡፡

‹‹የሰንበትን ቀን ትቀድሰው ዘንድ አስብ›› ዘጸ. 20፥8 ይህንን ቃለ እግዚአብሔር በሊቀ ነቢያት ሙሴ ላይ አድሮ ተናግሯል፡፡ ዕረፉባት  ያለው እግዚአብሔር የፍጥረቱን አቅም ባሕሪ ስለሚያውቅ ነው፡፡ ስናከብር ለነፍስ ዕረፍትና ፍስሐን ለሥጋ በረከት ሊያሰጡ የሚችሉ ሃይማኖታዊ ተግባራትን በመፈጸም የሚከበር ነው፡፡ በቤተክርስቲያን በመሰብሰብ ቃለ እግዚአብሔርን በመስማት/በመማር/፣ ንስሓ ገብቶ ቅዱስ ቁርባን በመቀበል፣ የተጣላ በማስታረቅ፣ ያዘነ የተከዘ በማረጋጋት በማጽናናት የታሰረ በመጠየቅ፣ በችግር የወደቁትን በመጎብኘት በአጠቃላይ በማቴ. 25፥35-37 ላይ የተጠቀሱትን ምግባራት በመፈጸም ከተከበረ ከእግዚአብሔር ዘንድ የማያልቅ ዘላለማዊ በረከትን ያስገኛል፡፡ ኢሳ. 56፥4-8 ይህችንም ዕለተ ሰንበት ያላከበረ እንዲገደል ትእዛዝ ተሠርቶ ነበር፡፡ እግዚአብሔርም ለሙሴ ‹‹ለእናንተ ቅዱስ ነውና ሰንበትን ጠብቁ፤ የሚያረክሰውም ሁሉ ፈጽሞ ይገደል÷ ሥራንም በእርሱ የሠራ ሰው ሁሉ ከሕዝቡ መካከል ተለይቶ ይጥፋ፡፡ . . . ››ዘጸ. 31፥14-15 ይህችን ዕለት የናቁ ሰዎች በሞት ተቀጥተዋልና፡፡ ዘኁ. 15፥32-36

Read more: ቅድስት

ዐቢይ ጾም

‹‹ጾም ትፌውስ ቊስለ ነፍስ››       በሚኪያስ ታደሰ ዘደብረ ኆኅተ ብርሃን

ጾም ማለት ለተወሰነ ሰዓት ለተመረጡ ቀናት ሰውነትን ከሚያበለጽጉ ፍትወትን ከሚቀሰቅሱ ምግቦች መከልከል ማለት ነው፡፡ ይህ ማለት በታወቁ ዕለታት (በሰባቱ አጽዋማት)  በታወቀው ሰዓት እስከ ቀኑ ዘጠኝ ሰዓት ከምግብና ውኃ ተከልክሎ ሥጋን ለነፍስ ማስገዛት ነው፡፡ ጾም ይህ ብቻ ሳይሆን ዓይን ከሚያየው፣ ጆሮም ከሚሰማው፣ አፍ ከሚናገረው፣ እጅ ከሚሠራው ክፉ እና መጥፎ ነገሮች በመከልከል ሕዋሳቶቻችንን ሁሉ ከኃጢአት ሥራ መቆጠብ ማለት ነው፡፡

ዐቢይ ጾም መባሉ በምሥጢሩም ሆነ በቀናት ብዛቱ ከአጽዋማት ሁሉ የበላይ ስለሆነና ጌታችን መድኃኒታችን ኢየሱስ ክርስቶስ የጾመው ጾም ስለሆነ ነው፡፡ የጌታ መጾም ትሩፋት ለመሥራት፣ ኃጢአት ኖሮበት ለሥርየት ሳይሆን መብል ለኃጢአት መሠረት እንደሆነ ጾምም ለምግባር፣ ለትሩፋትና ለድኅነት መሠረት መሆኑን ለማጠየቅ ነው፡፡ ሠራዔ ሕግ ነውና ጾምን ሕግ አድርጎ መስጠቱን ለመግለጽ ጾመ፡፡

 ጌታችን አርባ ቀንና አርባ ሌሊት ጾሞ፤ በዲያብሎስ ተፈትኖ፤ የጾምን ኃይል ያሳየበት ነው፡፡ ፈታኙም ዲያብሎስ በስስት ቢመጣበት በትዕግሥት፤ በትዕቢት ቢፈትነው በትሕትና፤ በፍቅረ ነዋይ ቢፈትነው በጸሊዓ ነዋይ ድል የነሣበት ነው፡፡

ይህም ጾም ከዚህ እስከ እዚህ ነው ብሎ ለመናገር አስቸጋሪ በመሆኑ በኢየዐርግና በኢይወርድ ተወስኗል፡፡ ይኸውም መግቢያው ከየካቲት 1 እስከ መጋቢት 5 ባሉት 35 ቀናት ሲሆን የሚደመደምበት ደግሞ ከመጋቢት 26 እስከ ሚያዝያ 30 ይሆናል ማለት ነው፡፡

ጾሙ ለ55 ቀን የሚጾም ሲሆን ሦስት ክፍሎችና ስምንት ሳምንታት አሉት፡፡

            ስምንቱ ሳምንታት

  1. ዘወረደ
  2. ቅድስት
  3. ምኲራብ
  4. መጻጕዕ
  5. ደብረዘይት
  6. ገብርኄር
  7. ኒቆዲሞስ
  8. ሆሣዕና

            ሦስቱ ክፍሎች

1.  ዘወረደ (ጾመ ሕርቃል)፡- ይህም ጾሙ ከሚገባበት ሰኞ ጀምሮ እስከ እሑድ ድረስ ያለው 7 ቀን ነው፡፡

2.  የጌታ ጾም፡- ይህም ከቅድስት ሰኞ እስከ ሆሣዕና ዋዜማ ዓርብ ድረስ ያለው 40 ቀን ነው፡፡

3.  ሕማማት፡-  ይህም ጌታችን በአልአዛር ቤት ለማዕድ ከተቀመጠበት የሆሣዕና ቅዳሜ ጀምሮ እስከ ሥዑር ቅዳሜ ያለው መከራን የተቀበለበት 8 ቀን ነው፡፡

ይህም 7 + 40 + 8 = 55 ማለት ነው፡፡

Read more: ዐቢይ ጾም

አንዲት ድንግል

                                                                                                                                                                                                                                                        

በመ/ር ሳሙኤል አስረስ ዘደብረ ኤልያስ

ስለ ድንግል ማርያም በመጽሐፍ ቅዱስ ውስጥ የተጻፈውን ስንመረመርና ስንመለከት እግዚአብሔር ለሌላ ለማንም ሳይሰጥ ለእርሷ ግን የሰጣትን ልዩ ጸጋ እናገኛለን፡፡ ለዚህም ነው ቅዱስ ገብርኤልና ቅድስት ኤልሳቤጥ በተመሳሳይ ቃል ‹‹አንቺ ከሴቶች መካከል የተባረክሽ ነሽ›› ብለው ያመሰገኗት፡፡ ሉቃ. 1፥28፣1፥42

በመጽሐፍ ቅዱስ ውስጥ ያለውን የእግዚአብሔርን ሐሳብ ያልተረዱ ብዙዎች ግን ስለ እርሷ ሲነገር ለመከራከር ቁጭ ብድግ የሚሉ ምስጋናዋ ሲነሳ ሆድ ቁርጠት የሚለቅባቸው አረፋ የሚያስደፍቃቸው ብዙ ናቸው፡፡ እንግዲ ምን እንላለን ከእግዚአብሔር የሆነን የእግዚአብሔር የሆኑትን አውቆ ክብር ይሰጣል፡፡

ስንጀምር የእግዚአብሔር ሐሳብ እና ቋንቋ የተለያዩ ነገሮች ናቸው፡፡ መጽሐፍ ቅዱስ የእግዚአብሔር ሐሳብ ነው የተጻፈው ግን በሰው ቋንቋ ነው፡፡ እንግዲ ከቋንቋው በስተጀርባ ያለውን የእግዚአብሔርን ሐሳብና ፈቃድ ለመረዳት መሪ ወይም ሊቃውንተ ቤተክርስቲያን ያስፈልጉናል፡፡ አልያም ለክርስቶስ የልደት ዘመን ከቀረቡ በመንፈሳዊ ዕውቀት ዳብረው ቤተክርስቲያንን በመከራና በእሳት ውስጥ ካገለገሉ ቅዱሳን አባቶች የተገኘውን የመጽሐፍ ቅዱስ ትርጓሜ ማየትና መመልከት ይጠበቅብናል፡፡

ኢትዮጵያዊውን ጃንደረባ ‹‹በእውኑ የምታነበውን ታስተውለዋለህን?›› ብሎ ሐዋርያው ፊልጶስ በሰረገላ ላይ ሆኖ ስለሚያነበው የነቢዩ የኢሳይያስን ትንቢት ትርጉም በጠየቀው ጊዜ እንዲህ ነበር ያለው ‹‹የሚመራኝ ሳይኖር ይህ እንዴት ይቻለኛል?›› የሐዋ. 8፥30

ወደ ትምህርቱ ዓላማ ስንመጣ በሉቃስ ወንጌል የተጻፈውን ‹‹አንዲት ድንግል›› የሚለውን ቃል ስናገኝ እንደ ቀልድ አንብበን አልፈነው ይሆናል፡፡ ግን ብዙ ትንታኔና አንድምታ የበዛው ኃይለ ቃል ነው፡፡ ‹‹አንዲት ድንግል›› የምትለዋ ሐረግ በራሷ ያለ ምክንያት አልተጠቀሰችም  በቀጥታ የእመቤታችንን ማንነት የሚያመለክቱ በርካታ ቁም ነገሮችን ታስከትላለች ዋና ዋና የምንላቸውን በማብዛት ሳይሆን በማሳነስ በማስረዘም ሳይሆን በማሳጠር እነሆ፡፡

Read more: አንዲት ድንግል

ምሥጢረ ጥምቀት

                        ‹‹በሰንበት ት/ቤቱ ትምህርት ክፍል››

ጥምቀት በጽርዕ ቋንቋ ኤጲፋኒያ በግእዝ አስተርዮ በአማርኛ መገለጥ ይባላል፡፡ ቃሉ በቀጥታ ሲተረጎም በውኃ ውስጥ ገብቶ መውጣት፣ መነከር፣ መዘፈቅ፣ መጥለቅ ማለት ነው፡፡ ጥምቀት ከሰባቱ ምሥጢራተ ቤተክርስቲያን (ምሥጢረ ጥምቀት፣ ምሥጢረ ሜሮን፣ ምሥጢረ ቁርባን፣ ምሥጢረ ንስሐ፣ ምሥጢረ ክህነት፣ ምሥጢረ ተክሊል፣ ምሥጢረ ቀንዲል) አንዱና ጌታችን አምላካችን መድኃኒታችን ኢየሱስ ክርስቶስ ለኒቆዲሞስ በዮሐ. 3፥5 ላይ ‹‹እውነት እውነት እልሀለሁ፤ ዳግመኛ ከውኃና ከመንፈስ ቅዱስ ያልተወለደ ሰው ወደ እግዚአብሔር መንግሥት ሊገባ አይችልም፡፡›› ብሎ እንደተናገረው ከውኃና ከመንፈስ ተወልደን የሥላሴን ልጅነት የምናገኝበት መንግሥተ ሰማያት የምንገባበት ኃጢአታችን የሚደመሰስበት ድኅነትን የምናገኝበት ዐቢይ ምሥጢር ነው፡፡ ጥምቀት በምሥጢረ ሥላሴና በምሥጢረ ሥጋዌ አምኖ ለሚፈጽመው ሰው ሁሉ ለኃጢአት መደምሰሻ ከሥላሴ የጸጋ ልጅነት ለመቀበልና የእግዚአብሔርን መንግሥት ለመውረስ የተሰጠ ልዩ የሕይወት መንገድ ነው፡፡

Read more: ምሥጢረ ጥምቀት

በዓለ ጥምቀት ሥርዓቱና ትውፊታዊ አከባበሩ 2004

በሕሊና በለጠ

     የኢትዮጵያ ኦርቶዶክስ ተዋሕዶ ቤተክርስትያን ከምታከብራቸው በዓላት መካከል የጥምቀት በዓል ከዋነኞቹ ተርታ የሚመደብና ሥርዓቱና አከባበሩም ለብዙ ዘመናት ብሔራዊ በመሆን የቆየ ነው፡፡ የጥምቀት በዓል አከባበሩ ጥንታዊ ነው፡፡ በብሉይ ኪዳን አይሁድ ከኢአማንያን ወገን የሆነ ሰው ወደ እምነታቸው ሲቀላቀል እንዲገረዝና በውኃ እንዲታጠብ ወይም እንዲጠመቅ ያደርጉ ነበር፡፡ በሐዲስ ኪዳንም አማናዊት ጥምቀት ከመመሥረቷ በፊት መጥምቀ መለኮት ቅዱስ ዮሐንስ "እኔስ ለንስሓ በውኃ አጠምቃችኋለሁ ጫማውን እሸከም ዘንድ ከማይገባኝ ከእኔ በኋላ የሚመጣው ግን ከእኔ ይልቅ ይበረታል እርሱ በመንፈስ ቅዱስ በእሳትም ያጠምቃችኋል" ማቴ 3÷11 ብሎ እንደተናገረው ሕዝቡን ለንስሓ በሚሆንና ለአማናዊት ጥምቀት የሚያዘጋጅ ጥምቀት ያጠምቅ ነበር፡፡

Read more: በዓለ ጥምቀት ሥርዓቱና ትውፊታዊ አከባበሩ 2004

Page 4 of 5

ተያያዥ ገጾች

ጥቅስ

‹‹ሞት ድንገት ትመጣለችና ከቀን ቀን አታሳልፍ›› ( ሲራክ 5፡7)

‹‹ፈጥነህ ስማ፤ ቃልን ለመመለስ ግን የታገስክ ሁን›› (ሲራክ 5፡11)

‹‹እግዚአብሔርን የሚፈሩ ሰዎች ቃሉን አይረሱም›› (ሲራክ 2፡15)

Joomla templates by Joomlashine