ቅድስት

የዐቢይ ጾም ሁለተኛ ሳምንት ቅድስት ይባላል፡፡ ‹‹ሰንበትየ ቅድስት›› የሚልና ይህንን የመሰለ የሰንበት ቅድስናን የሚያዘክር ምስጋና የሚቀርብበት ሳምንት ነው፡፡በተጨማሪ ቅድስት የተባለበት ምክንያት 40 ቀን ጌታችን ጾም የሚጀምርበት ሳምንት ስለሆነም  ጾሙን ለማዘከር ቅድስት ተብሏል፡፡

የሰንበትን ቀን ትቀድሰው ዘንድ አስብ ዘጸ. 20፥8 ይህንን ቃለ እግዚአብሔር በሊቀ ነቢያት ሙሴ ላይ አድሮ ተናግሯል፡፡ ዕረፉባት ያለው እግዚአብሔር የፍጥረቱን አቅም ባሕሪ ስለሚያውቅ ነው፡፡ ስናከብር ለነፍስ ዕረፍትና ፍሰሐን ለሥጋ በረከት ሊያሰጡ የሚችሉ ሃይማኖታዊ ተግባራትን በመፈጸም የሚከበር ነው፡፡  በቤተክርስቲያን በመሰብሰብ ቃለ እግዚአብሔርን በመስማት/በመማር/' ንስሐ ገብቶ ቅዱስ ቁርባን በመቀበል' የተጣላ በማስታረቅ' ያዘነ የተከዘ በማረጋጋት በማጽናናት የታሠረ በመጠየቅ' በችግር የወደቁትን በመጎብኘት በአጠቃላይ በማቴ .25፥35-37 ላይ የተጠቀሱትን ምግባራት በመፈጸም ከተከበረ ከእግዚአብሔር ዘንድ የማያልቅ ዘለዓለማዊ በረከትን ያስገኛል፡፡ ኢሳ. 56፥4-8 ይህችን ዕለት የናቁ ሰዎች በሞት ተቀጥተዋል፡፡ ዘኁ. 15፥32-36

 

የዕለተ ሰንበት ክብር

1.       በብሉይ ኪዳን እግዚአብሔር ፍጥረታትን ፈጥሮ በዕለተ ቀዳሚት ሰንበት ከሥራው ሁሉ ዐርፎባታል፡፡ ዘፍ. 2፥3 ዘጸ. 20፥8

2.       በሐዲስ ኪዳን ጌታችን የተጸነሰባት' ትንሣኤውን የገለጠባት' ለሐዋርያት ጸጋ መንፈስ ቅዱስን የሰጠባት' ዳግመኛ ለፍርድ የሚመጣባት … ወዘተ በመሆኗ ነው፡፡ በአጠቃላይ ታላላቅ ሥራዎችን የሠራባት በመሆኗ ከሌሎች ቀናት ለይተን እናከብራታለን፡፡

 

3.       ሌሎች ቀናት ሲያልፉ ዕለተ ሰንበት ባለማለፏ ለዘላለም ጸንታ በመኖሯ ነው፡፡ ድርሳነ ሰንበት ምዕ. 18፥3-7 በዕለተ ምጽአት ከማያልፉ ነገሮች መካከል ቃሉ' ዕለተ ሰንበት' የሰው ልጅ፤ መላእክት፤ ገሃነመ እሳትና መንግሥተ ሰማያት ናቸው፡፡ዛሬ ዛሬ የኃጢአት ሥራ ሁሉ ቀን ተለይቶ የሚፈጸመው ዝሙቱ፣ ሴሰኝነቱ፣ መዳራቱ ወዘተ … በዚች ቅድስት ዕለት ሆኗል፡፡ ‹‹ይህን ኃጢአት ቅድስት በምትሆን በዕለተ ሰንበት፣ በሰሙነ ሕማማት የሚፈጽም ወዮለት›› ይላል፡፡ /መጽሐፈ ፍትሐ ነገሥት/ የባልና የሚስት ሩካቤ ኃጢአት ባይሆንም በማይገባ ወቅት ይልቁንም በዕለተ ሰንበት በሰሞነ ሕማማት ረቡዕ እና ዐርብ ከተፈጸመ ኃጢአት ነው፡፡

ኢሳ. 58፥13-14 ‹‹ፈቃድህን በተቀደሰው ቀኔ ከማድረግ እግርህን በሰንበት ብትመልስ የሰንበትም ደስታ እግዚአብሔር የቀደሰው ክቡር ብትለው የገዛ መንገድህን ከማግኘት ከንቱ ነገርንም ከመናገር ተከልክለህ ብታከብረው በዚያን ጊዜ በእግዚአብሔር ደስ ይልሃል በምድር ከፍታዎችም ላይ አወጣሃለው፡፡ የአባትህን የያዕቆብን ርስት አበላሃለሁ የእግዚአብሔር አፍ ተናግሯል›› ሮሜ. 14፥16 ‹‹ቀንን የሚያከብር ለእግዚአብሔር ብሎ ያከብራል›› በማክበራችን ከእግዚአብሔር የምንቀበለው ዘላለማዊ ዋጋ ክብር አለና፡፡ ባለማክበራችን ደግሞ ቅጣት ጉዳት አለውና ነው፡፡ ሰንበትን በሚገባ ለማክበር ቸሩ እግዚአብሔር ይርዳን፡፡ አሜን፡፡

 

ምንጭ፡- መዝገበ ታሪክ ቁጥር 2

 

ተያያዥ ገጾች

ጥቅስ

‹‹ሞት ድንገት ትመጣለችና ከቀን ቀን አታሳልፍ›› ( ሲራክ 5፡7)

‹‹ፈጥነህ ስማ፤ ቃልን ለመመለስ ግን የታገስክ ሁን›› (ሲራክ 5፡11)

‹‹እግዚአብሔርን የሚፈሩ ሰዎች ቃሉን አይረሱም›› (ሲራክ 2፡15)

Joomla templates by Joomlashine